*वैद्यकीय प्रमाणपत्रांची होणार काटेकोर पडताळणी* *दोषी आढळल्यास कठोर कारवाई* - जिल्हा निवडणूक अधिकारी डॉ.विपीन इटनकर
नागपूर: ( दि. १८ मार्च २०२४ ) : निवडणूक प्रक्रियेत प्रशासकीय कामाच्यादृष्टीने बहुतांश अधिकारी-कर्मचारी हे कर्तव्यनिष्ठेने आपल्या जबाबदारीचे काटेकोर पालन करतात. तथापि काही अधिकारी-कर्मचारी हे जबाबदारी टाळण्यासाठी वैद्यकीय प्रमाणपत्राचा आधार घेऊन प्रशासकीय नियोजनात अडथळा निर्माण करतात. निवडणुकी सारख्या अत्यंत महत्त्वपूर्ण प्रक्रियेत खोट्या वैद्यकीय प्रमाणपत्राच्या आधारे जर कोणी खोटी वैद्यकीय प्रमाणपत्रे सादर केल्याचे पडताळणी नंतर आढळले तर अशा व्यक्तींविरुद्ध कठोर कारवाई करु असा इशारा जिल्हादंडाधिकारी तथा जिल्हा निवडणूक अधिकारी डॉ. विपीन इटनकर यांनी दिली.
नागपूर व रामटेक लोकसभा सार्वत्रिक निवडणुकीसाठी प्रत्येक गावपातळीवर मतदान प्रक्रियेसाठी मोठ्या प्रमाणात लागणाऱ्या मनुष्यबळाचे नियोजन जिल्हा प्रशासनातर्फे करण्यात आले आहे. सुमारे ३२ हजार शासकीय अधिकारी कर्मचाऱ्यांना विविध टप्प्यात प्रशिक्षणाचे नियोजन करण्यात आले आहे. प्रत्यक्ष व अप्रत्यक्ष ५० हजारापेक्षा अधिक मनुष्यबळ निवडणूक प्रक्रियेत आहे. या निवडणुकीत ७५ टक्क्यापेंक्षा अधिक मतदान व्हावे यादृष्टीने जिल्हा निवडणूक विभागातर्फे तयारी केली असून याबाबत स्वीप उपक्रमाच्या माध्यमातून गावपातळीवर जनजागृती केली जात असल्याची माहिती डॉ. विपीन इटनकर यांनी दिली. निवडणूक प्रक्रियेचा दैनंदिन आढावा घेऊन त्यांनी ही माहिती दिली.
